يا ربّي يسوع، لو منتأمّل اليوم وكلّ يوم بمدى حبّك للإنسان، لكنّا وعينا من ضياعنا، وبعّدنا عند الشرّ والشرّير اللي بيغري عقل الإنسان وحواسو.
يا ربّي يسوع، لو منتأمّل اليوم وكلّ يوم بسرّ هالحياة، وبتكوينك للإنسان، لكنّا ارتوينا من نبع حبّك اللي عطانا الحواس تا نبادلك فيها الحبّ بمحبِّتنا لبعضنا البعض.
يا ربّي يسوع، لو منتأمّل اليوم وكلّ يوم بسرّ الموت، لكنّا تأكّدنا إنّو هوي مرحلة عبور من الحزن الأرضي للملكوت السماوي مطرح السعادة الأبديِّة.
يا ربّي يسوع، اعطينا النعمة إننا نبقى مستعدِّين، بكلّ إيمان، ومن خلال أعمالنا اللي بتليق فيك، للحظة الحقيقة، لحظة مغادرة هالعالم الزايل وإنتظار الدينونة، على رجا إنها تكون لحظة اللقاء الأبديّ والإستقرار فيك.
/الخوري يوسف بركات/
