25 Sep
25Sep

يا ربّي يسوع، كل يوم منسمعك بقلوبنا وقت بتحكينا بالإنجيل، ومنشوفك عم تعطينا ذاتك من خلال القربان المقدّس، بس كمان نحنا متأكّدين إنّنا رح نشوفك بالإنسان المهمّش.


واليوم يا ربّي يسوع، منتلمّس حضورك بيناتنا عم تدعينا تا نكون متل الخراف بين ذئاب العالم، بوداعة وسلام ومحبّة، بعاد عن العنف والطمع والكراهية.


يا ربّي يسوع، صعبة نكون ودعاء متل الحملان، صعبة ما نقاوم الشرّ بالشرّ، صعبة نردّ الشتيمة والإضطهاد بالمسامحة والمغفرة، هيدا صحيح، بس الأحلى لَمَّن منحسّ بالسلام وقتا منغفر، والأقوى لمّن بتكون نار الحبّ شعلانة فينا.


هيدي رسالتنا يا يسوع، ورح نسعى إننا نعيشا، ورح نكون نورك بهالعالم، وملحك بهالدني.



/الخوري يوسف يركات/

تعليقات
* لن يتم نشر هذا البريد الإلكتروني على الموقع.