يا ربّي يسوع، بهالعيد المقدّس منتأمّل بهالخشبة اللي من خلالا إرتفعت بالألم تا تفتدينا وتموت كرمالنا وتشيل عنّا ظلمة الخطيّة اللي إستعبدتنا وبعدا عم تستعبدنا.
بصليبك يا ربّي يسوع صار إلنا الخلاص، ويا ريت منعرف قيمة إرتفاعك عالصليب حبّا فينا، ويا ريت منرفع عن عيوننا برقع الضياع واليأس، تا نقدر نشوف طريق الرجا صوب الملكوت السماوي.
يا ربّي يسوع، منصرخلك اليوم صرخة رجا :
إرحمنا تا نقدر نحبّ صليبك ونحملو بداخلنا، ومنّك ناخد القوّة تا نبقى صامدين بوجّ الخطيّة المغلّفة العالم.
إعطينا يا ربّ الجرأة تا نوهبك حياتنا، ونحط حالنا بتصرّفك، ونتبع مشيئتك، ونحمل الصليب معك بفرح، ونصيّرو جسر عبور لعندك بالحياة الأبديّة.
/الخوري يوسف بركات/
