يا ربّي يسوع، في مشكلة بالحياة عم بتواجه البشريّة كلّا، وهالمشكلة إنت حذّرتنا منها، وهيّي حبّ المال المستعبد العالم الضايعة بوهم فكرة السعادة اللي بيجلبا المال وتوابعو.
يا يسوع، هالزلمي الغني، اللي كان جايي لعندك تا تباركلو مصرياتو وجيبتو، كان بدّو إنّو يربح شعبيِّة باللي عم بيعيشو، ويثبِّت النظريِّة اللي بتقول إنّو بالمال الإنسان بيلاقي السعادة.
بس إنت يا ربّي يسوع، حطّيت الإصبع عالجرح لمّن نقّيتو تا يتبعك وإنت عارف إنّو أموالو الكتيري اللي صارت هويتو وإلهو، منَعتو من إنّو يتخلّى عن كل شي بيملكو.
يا ربّي يسوع، مع كل هالنّعَم اللي بتفيضا علينا، أعطينا إننا نبقى متواضعين وما نتكبّر لا عليك ولا على بعضنا.
/الخوري يوسف بركات/
