مشروعك إنت أو مشروع المسيح؟!!
إذا إنت معمّد يعني إنت مش بالضرورة تكون مسيحي، وإذا بتعتبر حالك مسيحي لازم تحمل مشروع المسيح مش مشروعك وفكر المسيح مش فكرك..
إذا كنت بتحمل بعقلك وبكيانك فكر المسيح يعني إنت بتمثلو، يعني إنت سفيرو بتحكي بإسمو ومش بإسمك وبتلتزم بمبادؤو مش بمبادءك..
كل الناس بيحكوا عن "مشروعن" بوسائل مختلفة، وتقريباً الكل بيقول إنو مشروعو هوي الافضل وبيحاول يشوه صورة مشروع غيرو، وتقريباً الكل متفق إنو ما حدا بيقول عن "زيتاتو عكرين" وما بيقبل المساس بمشروعو أو عقيدتو أو فكرو أو رأيو أو التطاول على ثوابتو وقيمو، والأغلبية العظمى من الناس بيتحمّسوا زيادة وبيعلّوا الصوت وبيهدّدوا وبيشتموا إذا حدا تطاول ع مشروعن..
في كتير مشاريع بهالايام بتشوّه صورة الإنسان وصورة الله كمان، قبل كان في مشروع هيرودس وسقط بالميلاد وكان في مشروع بيلاطس وسقط بالصليب وكان في مشروع خيانة يهوذا وسقط بالقيامة، وكان في مشروع نكران بطرس وسقط بالحب، وكان في مشروع شكّ توما وسقط بالحقيقة، وكان في مشروع اضطهاد شاول وسقط بقوة نور المسيح ع طريق دمشق، وكان في مشروع اضطهاد الامبراطوريه الرومانيه لمشروع يسوع وسقط بقوة الصليب ع جسر ميلانو مع الامبراطور قسطنطين...
في ناس بحبوا يشوهوا صورة الانسان، ويعملوها ع صورتهن ومثالهن، يعني بحبوا يطفوا النور اذا ما عندن نور، وبحبوا يقسوا قلوبن اذا ماعندن قلب، وبحبوا يقتلوا الامل والرجاء وبحبوا يسكنوا القبور وبحبوا يعيشوا أشقياء ويموتوا أشقياء وبحبوا يكونوا عبيد بإيد الشيطان وبحبوا يرفضوا الحب ويشوهوا الحق ويقدسوا الشر ويشربوا من دم الأبرياء حتى يسكروا!!!
فإذا كان مشروع بعض الناس هو مشروع موت الانسان، مشروع يسوع هو قيامة الإنسان واذا كان مشروع بعض الناس بيشوّه صورة الحب والخير والجمال..بس هني بيعرفوا قبل غيرن إنو لا هني ولا غيرن بيقدروا يطفوا شعلة الحب يللي اتفجرت من قبر المسيح، وهني بيعرفوا قبل غيرن إنو المحبة بتتحمل كل شي وبتصبر ع كل شي وبتنتصر بكل شي، وهني بيعرفوا قبل غيرن إنو مشروعن فاشل لانو ميّت قبل ما يولد لكن مشروع يسوع ولد من رحم الصليب وتعمّد بدم الشهداء وتثبّت ببطولة القديسين.
مواجهة هيك مشاريع بتكون بالالتزام بمشروع يسوع والانتصار الحتمي ع هيك مشاريع بتكون بحمل أطباع وأخلاق يسوع...
هيك عمل بولس تخلّى عن مشروعو وتبنّى مشروع يسوع بالكامل، تصالح مع نفسو ومع الله واعتبر حالو سفير المسيح "وكَأَنَّ ٱللهَ نَفْسَهُ يَدْعُوكُم بِوَاسِطَتِنَا".
بس مشروع يسوع متعب ومش هيّن "بَلْ نُظْهِرُ أَنْفُسَنَا في كُلِّ شَيءٍ أَنَّنَا خُدَّامُ ٱلله، بِثَبَاتِنا العَظِيمِ في الضِّيقَاتِ والشَّدَائِدِ والمَشَقَّات، في الضَّرَبَات، والسُّجُون.." إذا بتعرف من هلق شو ناطرك مع يسوع وبتكفي متل بولس بتكون عن جدّ بطل، لإنو الحب بدّو أبطال! المعركة كبيرة مع نفسك بالاول وبعدان مع العالم والمواجهة كتير صعبة وكتير خطرة..
يسوع انتصر ع مشاريع هيرودس وبيلاطس وكل أباطرة الرومان من نيرون حتى قسطنطين وكل مشاريع الشيطان بالصليب يعني بالحب يعني بالقيامة.
المواجهة بتكون بفتح الانجيل والتعمق يوميا بكلمة الله ودراسة لاهوت الكنيسة والتعرف ع حياة القديسين الكبار والتمثل بمحبتن، وخلق جماعات من الشباب والصبايا بتصلي وبتعيش الحب حتى الاستشهاد بقلب الرعايا بقلب الشوارع والحارات والضيع والمدن..
المواجهة بتكون بخلق جيش من اللي بيصلوا المسبحة وبيقدسوا الاحد وبيعرفوا كرسي الاعتراف وبيعملوا اماتات يمكن ما بتخلص "نُحْسَبُ كَأَنَّنَا مُضِلُّونَ ونَحْنُ صَادِقُون! كأَنَّنَا مَجْهُولُونَ ونَحْنُ مَعْرُوفُون! كأَنَّنَا مَائِتُونَ وهَا نَحْنُ أَحْيَاء! كأَنَّنَا مُعَاقَبُونَ ونَحْنُ لا نَمُوت.." المواجهة بتكون بتقديس الارض والجو بتقديس المطعم والشركة بتقديس العمل والعيلة والزواج بتقديس الالتزام والأمانة والإخلاص والعفة والتواضع والوداعة والصلاة من أجل الأعداء...
المواجهة بتكون بالصلا من أجل الخاطي تيتوب ومن أجل المريض تيشفى ومن أجل الضال ت ربنا يهديه ومن أجل الميت ت ربنا يحييه ومن أجل مشروع يسوع ت يصير مشروع كل إنسان.
أحد مبارك
/الخوري كامل كامل/
