صبحية مع الرب

بصباح هالأحد المجيد منرفعلك يا ربّ كل التمجيد والتسبيح والاكرام عا كل مواهبك ونِعَمَك وعطاياك اللي بتنعم علينا فيون.


ومن هالنّعم والعطايا خصّصتنا يا ربّ بموهبتين، نحنا المؤمنين فيك، وهنّي: العمل والإصغاء.

قدّيش مهمّ نكون متل مرتا بحياتنا الروحيّة، نعرف كيف نجسّد ايماننا فيك يا ربّ من خلال أعمالنا والاهتمام فيك بالمريض والمهمّش والفقير وخصوصي بهالظروف الصعبة اللي عم نمرق فيها بوطننا الحبيب.

وقدّيش مهمّ كمان اننا نكون متل مريم نعرف نختار النصيب الأفضل يا ربّ واللي هوّي اننا نجي لعندك، ونقعد معك جلسات وجلسات، تحكينا فيا ونحكيك، وتعبّرلنا عن قوّة حبّك لإلنا، من خلال الكتاب المقدّس، ونعبّرلك عن حبّنا لإلك بحضورنا معك.

شو حلو هالسرّ، سرّ حبّك يا ربّ اللي ما بينتهي واللي بتدعينا فيه تا نبادلك هالحبّ بأقوالنا وافعالنا.


/الخوري يوسف بركات/