صبحية مع الرب


21 Aug
21Aug
إعلان خاص

منسبّحك ومنمجّدك ومنباركك ومنشكرك يا ربّي يسوع ببداية هالنهار اللي فيه عم تدعينا تا نترك كل شي بيعلّقنا بالأرضيات وبالعالم ونتبعك.

وهيدا هوّي الأساس يا ربّ: اننا نتخلى عن كل شي تا نقدر، او حتى نستحق، نكون تلاميذك، لأنّو ما ممكن اننا نكون معك وبالوقت ذاتو مع العالم.

بدنا نختار، لا بل دعوتنا نختار: يا حياة العالم واللي بتحملو من خطايا وشهوات وملذّات ارضيّة، يا الحياة معك والصليب اللي بيرافقا.

وكلامك واضح وصعب يا ربّ، لمّن بتنبّهنا من التعلّق بالعالم، وحتى وصلت انّك تحذّرنا من التعلّق بالعيلة وبأفرادا اللي ممكن يكونو سبب يبعّدنا عنك، متل ما صار مع ابراهيم اللي تعلّق بأبنو اسحق وتاه عنّك.

منعرف يا ربّ انّو اللي عم تحكيه كتير صعب، بس كتير من القديسين عاشو بحسب كلامك، ودعوتنا نتمثّل فيهن، مش نهمل أهلنا ولكن نعرف نحطّك الاساس بحياتنا وولا حدا وولا شي بياخد مكانك.


/الخوري يوسف بركات/

تعليقات
* لن يتم نشر هذا البريد الإلكتروني على الموقع.