صبحية مع الرب

مع كل إشراقة شمس بكل صباح منرفعلك اناشيد التسبيح والمجد والشكر يا ربّ الأرباب.

ما في أجمل وأهم من كلامك يا ربّي يسوع، انت اللي بتحطنا قدام ذاتنا وبتحمّلنا مسؤولية الرسالة اللي حاملينا وهيي اننا نعرف كيف نعامل الناس.

قدّيش بدّو يكون عنّا من حكمتك يا ربّ تا نعرف نميّز تصرّفاتنا ونوجّها للخير ولمجدك.

قديش بدّو يكون عنّا الوعي تا نعرف نواجه كل التحدّيات اللي عم نمرق فيا، ونتغلّب عليا بقوّة روحك القدّوس.

قدّيش بدّو يكون عنّا من المنطق اللي كنت عم بتعلّمو لتلامذك ولرسلك تا نعرف نحكي كلام إلو معنى وبيفيد ويكون هدفو تمجيدك.

ومع اننا منعرف انّو لازم نعيش بحسب تعاليمك تا نقدر نوصل عالملكوت، بس ال "أنا" عنّا بتحاول تتغلّب عا ارادتنا.

لهيك منطلب منّك تبقى معنا وتعطينا القوّة تا نكمّل معك للنهاية وما نستسلم.


/الخوري يوسف بركات/