صبحية مع الرب

منرفعلك يا ربّ كل التسبيح والمجد والشكر عا كل النعم والعطايا اللي دايما بتفيضا علينا وخاصة بالأوضاع الصعبة وأهما التواضع والصبر.

يا ربّي يسوع، شو فيها هالدني تا الانسان بيركض ورا المراكز والمناصب والمال عا حساب الآخرين؟ وناسي انّو بالملكوت رح يكون واقف عالباب وناطر بحزن تا تفتحلو الباب وهوي عارف انّو تسكّر بوجّو نتيجة تكبّرو وأعمالو اللي ما بتليق فيك.منّك ومن كلامك يا ربّي يسوع مناخد العبرة انّو كل اللي بيبرم تا يبيّن حالو ويتعامل مع اخوتو بفوقية وتكبّر ما رح يقدر يوصل للملكوت، بينما كل اللي حاططك الأوّل وهدف حياتو وعم يحاول يتمثّل فيك ويعيش التواضع متل ما انت عشتو وبتطلب منّا نعيشو، أكيد رح تكون بواب السما مفتوحة لإلو.

نحنا عارفين إنّو الحلّ عند كل واحد وواحدة منّا ورغم هالشي منبقى عم نتصارع مع آفّة التكبّر. لهيك منطلب روحك القدّوس تا ينزعا منّا ونرتاح فيك.


/الخوري يوسف بركات/