صبحية مع الرب

منسبّحك ومنمجّدك يا ربّ ومنشكرك عا حضورك الدايم بكل لحظة من لحظات حياتنا.

متل ما الأكل ما بيكفي من دون المقبّلات ولا الخردل، وبحاجة لهالحبّات الصغيرة تا يعطيه نكهة، هيك بيكون ملكوتك يا ربّ بالعالم.

واللي بيعطيه نكهة هوي حضورنا ككنيستك بالعالم.

هيدا الحضور بيحطّنا قدّام مسؤولية كبيرة، لأنّك شبّهتنا بالملح للأكل وبالخردل للنكهة، وما رح يكون نافع الملح اذا فقد طعمتو ولا الخردل نكهتو.

لهيك دورنا بالعالم، كتلاميذ ورسل، كتير مهم بس صعب.

صعب لأنو علينا اننا نكون عم نعرف نعكس نورك بالعالم اللي نحنا فيه رغم الصعوبات، ونعرف نواجه الصعوبات بقوة الروح القدس اللي بيملّينا ايمان ورجا وعزا.

وتا يكون ملكوتك حاضر بهالعالم، علينا اننا نكون الخمير بالعجين تا نقدر نخمّر العجنة كلّا، يعني نكون فرحك وحبّك وسلامك بالعالم تا نقدر نعدي كل مين بيلتقي فينا.


/الخوري يوسف بركات/