صبحية مع الرب


11 Aug
11Aug
إعلان خاص

منرفعلك كل التسبيح والمجد والإكرام بهالصباح اللي عم تشرق فيه علينا من نورك يا ربّ.

قديشك صابر علينا يا ربّ، نحنا اللي ما عم نعطيك ثمر من رسالتنا ومن شهادتنا لإلك بكتير من الأوضاع اللي مدعوين فيها إننا نعكس مشيئتك من خلالنا؟

قديش بتحبنا يا ربّ تا عم ترحمنا، مع إنّك عارف ومتأكّد من خيانتنا لإلك المتكرّرة بمواقف كتيرة مناخدا وما بتليق فينا كأبناء لإلك؟

قدّيش عندك ثقة فينا يا ربّ، تا بعدك بتدعينا، رغم محدوديّتنا وضعفنا، لنكون رسلك وصورة حلوة عنّك بمجتمعاتنا وبكل مكان منكون فيه؟

قدّيش صبرك علينا بيحطنا قدام ذاتنا تا نسأل حالنا لوين رايحين بهالدني وشو عم نعمل تا نخليك تفتخر فينا يا ربّ؟

حبّك لكل واحد وواحدة منّا بيخلّينا نوعا عا أهمّيّة دعوتنا بالحياة وعا أهمّيّة حضورك بحياتنا، ساعتا رح نقدر نثمر ثمر الفرح والقداسة اللي بتدعينا إلن.


/الخوري يوسف بركات/

تعليقات
* لن يتم نشر هذا البريد الإلكتروني على الموقع.