صبحية مع الرب

منرفعلك كل التسبيح والشكران مع غياب الليل وشروق الصباح يا نور الصباح.

أجمل ما في بالحياة يا ربّ هيي عنايتك الإلهيّة فينا نحنا ولادك اللي حبّيتنا وجيت عا هالأرض كرمالنا تا تعطينا الخلاص والحياة الأبدية معك.

ومع إطلالة هالصباح منتأمّل كيف هالطيور اللي عمتبرم كيف بدها تسبّحك وتشكرك عالحياة اللي عايشين فيها.

يا ربّ إنت اللي كوّنتنا وخلقتنا أحرار بكلمة منّك، كيف بيكون عنّا الجرأة إننا نتخلّى عنّك بوقت الصعوبات والتجارب اللي بيحطّلنا ياها الشيطان؟

قدّيشك عظيم إنت يا ربّ، كيف بتكون حاضر دايما تا تملّينا فرح ورجا بعالم فقد الرجا وبلّش يحسّ باليأس والألم بكلّ لحظة بيتخلّى فيها عن عنايتك الأبويّة وبيرفض النعم اللي عم بتفيضا عليه.

اليوم بداية حياة مهمّة لإلنا معك يا ربّ عا شرط اننا نستسلم لمشيئتك من دون تردّد.


/الخوري يوسف بركات/