صبحية مع الرب


31 Jul
31Jul
إعلان خاص

بهالأحد المبارك، وبهالصباح اللي عم تدعي فيه زكّا العشار تا يستقبلك عندو، منرفعلك التسبيح والتمجيد يا إلهنا الحبيب.

بهاليوم اللي عم تعطي فيه الخلاص لبيت زكّا، اللي كان عشّار وخاطي قبل ما بلتقي فيك، منطلب منّك انّك تفوت عا قلوبنا وتسكن فيها وتباركا وتخلّصا تا تصير بيتك ومن خلالو بتشعّ نورك عالآخرين.

بهاللحظة اللي انطلق فيها زكّا لعندك تايب وبقلبو وبفكرو وعد انّو يعطي لكل مين إلو حق عليه حقّو، نحنا كمان مننطلق بقلب منسحق وتايب صوبك تا تحولنا افكارنا وعقولنا تا تصير تفكر فيك وحدك وتحبّك بكل انسان منلتقي فيه.

ومتل ما زكّا اللي تاب، بكلمة منّك، عن كل افعالو ونظراتو اللي أهانت الناس واحتقرتا، نحنا كمان بدنا ياك تحولنا نظراتنا تا ما نشوف الا الجمال بظل بشاعة اللي عم بيصير معنا، وما نفكّر الا بالخير رغم كل التحدّيات الصعبة والمتعبة اللي عم بتواجهنا.


/الخوري يوسف بركات/

تعليقات
* لن يتم نشر هذا البريد الإلكتروني على الموقع.