صبحية مع الرب


25 Jul
25Jul
إعلان خاص

بصباح هالأحد المبارك، منرفعلك أناشيد التسبيح والتمجيد يا ربّ السما والأرض.

حلم عند كل إنسان ، يا يسوع، هوي إنّو يحلّ ملكوتك بالعالم اللي هوي فيه.

هالملكوت كان حاضر يا رب بوجودك بين الرسل والتلاميذ، والدليل هوي المحبّة والسلام والتواضع والمغفرة اللي زرعتن عالأرض وبقلوب تلاميذك.

بس كمان ملكوتك موجود فينا نحنا يا رب وبيحمّلنا مسؤولية العيشة بحسب تعاليمك بوقت وبظروف صعبة وغدارة، وهيدا دورنا ودعوتنا إننا نسعى إننا نعيشو بفرح.

يا ربّ، إنت اللي تركتلنا الحرّية تا نختار الحياة معك أو نرفضك.

لهيك إنت دايماً بتتركنا ننقّي الحياة اللي بدنا نعيشا، والسؤال بتخلينا نطرحو عا حالنا: نحنا وين من الحياة معك؟

كلنا ثقة بالرسالة اللي عطيتنا ياها يا ربّ، وهيي إننا نعيشك بين الناس، ونحضّر من هاللحظة للقاءك بكرا.


/الخوري يوسف بركات/

تعليقات
* لن يتم نشر هذا البريد الإلكتروني على الموقع.