صبحية مع الرب


21 May
21May
إعلان خاص

يا ربّ، انت بتقول انّو اهمّ واوّل وصيّة هيّي اننا نحبّك من كل قلبنا ومن كل نفسنا ومن كل فكرنا وكل قوّتنا. وهيدا اللي دايما منقلّك ياه من شفافنا بس اكيد منّو واقعي ومنكون عم نبالغ فيه.

ياما وياما قلوبنا بتكون بغير محل وبعيدة كتير عنّك.ياما وياما نفسنا بتكون متعلّقة باشيا ارضيّة وسخيفة وما بيهمنا الّا المال والمركز والسلطة.ياما وياما فكرنا بيكون متوجّه صوب التفلسف عليك يا ربّ وما منعود نفكّر الّا بحالنا.


وياما وياما قوّتنا عم بتكون بعيدة عن الاستسلام لروحك القدّوس ومنصير نعيش التكبّر عا غيرنا.


وكلّ اللي طالبو منّا وضّحتلنا ياه بوصيتك لإلنا لمّن ربطت حبّنا لإلك بحبّنا لبعضنا لبعض. فإذا بدنا نحبّك متل ما بدّك، علينا اننا نحبّ بعضنا.


نوّرنا يا ربّ، تا نعرف انو حبّنا لالك هوي مشروع حياة دايم، بيتجسّد بمحبّة القريب واللا رح يبقى عواطف وما بيتناسب مع الحبّ اللي حبّيتنا ياه.


/الخوري يوسف بركات/

Social media khoddam El rab
تعليقات
* لن يتم نشر هذا البريد الإلكتروني على الموقع.