صبحية مع الرب

كل ما بتشرق شمسك علينا يا ربّ، منتأكد من حضورك الدايم معنا ومنشعر بدفئ حنانك علينا.

وعا قد منّك بيّ حنون يا ربّ، قلبك ما بيرفض طلباتنا نحنا ولادك، بس شرط انّنا نكون عم نعرف شو نطلب، وتكون طلباتنا لخيرنا ولتمجيد اسمك.

وعا قد منّك بيّ رحوم، قلبك بيرق علينا نحنا ولادك الضعفا اللي ما عم نعرف شو بدنا بهالحياة، واكتر طلباتنا عم بتكون مادّية ومش روحيّة.

يا ربّي يسوع، اوّل طلب منطلبو منّك هوّي انّك تبقى معنا لو مهما ضعفنا وأغوتنا ملذّات العالم.

تاني طلب منطلبو منّك يا ربّ، هوّي انّك ما تحرمنا من اللقاء فيك بسرّ القربان المقدّس ومن اننا نتناولك، انت خبز الحياة، بالذبيحة الالهية.

تالت طلب هوي انّك تساعدنا على اننا نغفر لكل انسان اخطأ بحقّنا تا نستحق انّك تغفرلنا خطايانا.

ومنطلب منّك انّك تنجّينا من الشرّير وتجاربو، لأنّك انت وحدك الحيّ والمالك للأبد عا حياتنا.

/الخوري يوسف بركات/