صبحية مع الرب


13 Jul
13Jul
إعلان خاص

بصباح هالنهار المبارك، منرفعلك يا ربّ كل التسبيح والتمجيد والشكر عا هالليل اللي مرق علينا، وعا هالنهار اللي رح يمرق علينا.

بكل مرّة كنت تقعد فيها مع تلاميذك، يا ربّ، كنت تعلّمن، وهنّي بدورن يعلّمونا، كيف يصلّو.

ومش بس يصلّو، كمان علّمتن وبتعلّمنا كيف يكون عنّا ثقة فيك انّن رح تحقّقلنا طلباتنا، بس مش حيللا طلبات.

ما بعرف قديش عنّا ثقة فيك يا ربّ تا منفكّر انّك ما عم تستجيب لطلباتنا، والمشكلة الأساسية هيي فينا لأنّو اغلبيّة طلباتنا مادّية وما عم بتكون روحيّة.

واليوم منسمعك عم بتشدّد علينا يا ربّ تا نطلب منّك الأساسي والجوهري، ونلحّ بطلبنا لتحقيقو، وما نكون غرباء عنّك، لأنّك انت بيّنا والهنا ومخلّصنا.

اليوم، ما بدنا يا ربّ الّا انّك تشملنا برحمتك وتغمرنا بحنانك، وتغفرلنا كل هفوة ارتكبناها ونسينا، او تناسينا، اننا نسلّم ذاتنا للروح القدس.

بدنا نحسّ فيك بيناتنا، ونشعل بنار حبّك اللي مغلّف كل حياتنا.


/الخوري يوسف بركات/

تعليقات
* لن يتم نشر هذا البريد الإلكتروني على الموقع.