صبحية مع الرب

صباحنا اليوم بيبتدي بالأمانة للرسالة معك يا ربّي يسوع المسيح.

بهالنهار المبارك اللي خصّصو البابا فرنسيس للصلاة والصوم عا نيّة وطننا لبنان الحبيب والجريح، منقدملك، يا ربّ، قلوبنا وعقولنا وافكارنا وصلواتنا تا تتجاوب مع دعوة البابا لالنا.

منرفع قلوبنا بالعالي اليوم الك يا ربّ، تا تنبض بقلبك الأقدس، وتا ترجع الحياة عا قلب لبنان، تا يبقى وطن السلام ووطن المحبة ووطن الرسالة.

منرفع عقولنا بالعالي اليوم الك يا ربّ، تا تكون كل اولوياتا كيف ترضيك وتثبت بإيمانا فيك.

منرفعلك يا ربّ كنيستنا بمسؤولينا ومؤمنينا، تا تكون كل القرارات اللي بتاخدا لمجدك ولخير ابناءك اللي افتديتن بدمك الكريم.

ومنرفعلك كل المسؤولين بوطننا الحبيب تا يرجعو ينهضو بذاتن، من خلال التوبة، لبرّ الأمان معك.

/الخوري يوسف بركات/