صبحية مع الرب

بهالصباح المبارك، منرفعلك كل التسبيح وكل الشكر يا ربّ عا هالليل اللي مرق علينا وعا هالنهار اللي رح يمرق ونحنا عم نعيشو معك بكل امانة لرسالتنا.

شو حلوة ومهمة هالجملة اللي بتقولا يا ربّ للرسل ولإلنا: "من يصبر الى المنتهى يخلص"، والمنتهى هوي معك يا ربّ.

بس انت بتعرف إنّو مش هينة اننا نصبر بهالظروف الصعبة اللي عم نعيشا.

مش هينة علينا يا ربّ اننا نصبر بهالأزمات والمشاكل المادية والسياسية والاقتصادية والاجتماعية واللي عم بتحاول تأثّر سلبا عا حياتنا الروحيّة وعا علاقتنا فيك.

بس نحنا كلنا ايمان وكلنا ثقة بروحك القدّوس اللي بيعزّينا دايما، والحاضر الدايم تا ينجّينا من كل محاولة يأس من هالحياة.

نحنا كلنا ايمان وكلنا ثقة بإنّك وحدك النبع والهدف والمعنى لحياتنا.

انت اللي خلقتنا ونقّيتنا تا نكون رسلك ونعيشك بهالعالم الضايع، ونحنا رح نكون قدّا.

/الخوري يوسف بركات/