صبحية مع الرب


20 Jun
20Jun
إعلان خاص

ببداية هالأسبوع المبارك منرفعلك كل التسبيح والتمجيد يا ربّ السما والأرض.

قديش دعيت يا رب رسلك وتلاميذك تا يحملو البشارة لكل الناس، وقديش شدّدت عالطريقة اللي فيون ينشرو فيها حبّك وسلامك.

وما اكتفيت بدعوتك لتلاميذك للبشارة، لا بل فسّرتلن إنّو البشارة بتبلّش بداخل الانسان تا تتخمّر وتستوي وبعدا الانطلاق للخارج.

والأهم بالرسالة اللي دعيتن فيها هيي إنو تكون أفعالن تعكس الأقوال اللي رح يقولوها، إن كان عن المحبّة أو التضحية أو المسامحة.

وهالرسالة رح تبقى فارغة إذا ما كانت مليانة من إلهامات الروح القدس وبنعمة منّك يا ربّ، لأنّك إنت أساس وهدف الدعوة.

ونحنا يا ربّ، اللي منعدّ حالنا تلاميذك ورسلك بمحيطنا ومجتمعنا، رح نكون مستعدين لهالرسالة بحبّ وبمجّانيّة تا نقدر ننشر سلامك وين ما منكون.


/الخوري يوسف بركات/

Social media khoddam El rab
تعليقات
* لن يتم نشر هذا البريد الإلكتروني على الموقع.