مع إشراقة نور هالصباح ببداية هالأسبوع ، منرفعلك كل التسبيح والإكرام يا إله المحبّة.
كرمالك وكرمال كلمتك يا ربّي يسوع بطرس والرسل زتّو الشباك للصيد لأنّو كلمتك بتقلب كل المقاييس والمواقف وبتفتح كل الأبوب المسكّرة.
كلمتك يا ربّ هيّي كلمة الحياة، ومش حيللا حياة: الحياة الأبديّة معك.
ونحنا عم نحاول نستعد للقاءك فكريًّا وروحيًّا وتكون شباكنا محصّنة بالروح القدس تا ما تتمزّق بفعل الخطيّة.
إنت اللي جيت عا عالمنا تا تخلّصنا من الخطيّة ومغرياتا يا ربّ، بتدعينا تا نلقي ذاتنا بين إيديك ويكون عنّا ملء الثقة بإنّك حاضر تا نشيلنا وتخلّصنا من شباك الشرّير.
والأجمل هوّي إنّو شو ما كانت حالتنا الروحيّة والنفسيّة، إذا كنّا معك يا ربّ، وحاطين حالنا جنود لرسالة الحب معك، رح نقدر نكون عم نشارك معك بسرّ الخلاص.
/الخوري يوسف بركات/
