04 May
04May

صباحك يا ربّ هوي صباح الأمل والرجا والفرح والسلام لأنّك إله السلام، وعندك كل الفرح والطمأنينة، وفيك الحياة بتكتمل.

يا يسوعنا الحبيب، يا خبز الحياة، اللي قدمت ذاتك لإلنا غذاء تا ما نكون عم نعتاز لشي وما تقوى علينا أبواب الجحيم، منشكرك لأنّك ما تركتنا ولا بتنسانا وخصوصي وقت الحاجة، الكبيرة والصغيرة، الروحيّة والماديّة.

يا يسوعنا الحبيب، يا إلهنا الغالي، اللي بتعرف كل حاجاتنا، نحنا منعرف إنّك ما وعدتنا بالغنى المادي، ولا بالمراكز ولا بالجاه، منشكرك لأنّك بتحبنا متل ما نحنا.

يا إله الرحمة، مملكتك مش من هيدا العالم الزايل، منشكرك لأنّك وعدتنا ووفيت بوعدك بإنّك تعطينا خبزنا الجوهري كل يوم، وما حرمتنا منّو.

يا ربّ السما والأرض، كنوز الدني كلّا ما بتسوى شي قدّام غنانا فيك، مع العلم في جوع أرضي، بس معك يا يسوع نحنا دايماً شبعانين منّك لأنّك إنت الحياة.


/الخوري يوسف بركات/

تعليقات
* لن يتم نشر هذا البريد الإلكتروني على الموقع.