بصباح هالنهار من الأسبوع الأوّل اللي فيه منتذكر قيامتك يا يسوع من بين الأموات، منرفعلك كل التسبيح والمجد والإكرام يا يسوعنا الحبيب.
مع القديس جرجس الشهيد لإيمانو فيك يا ربّي يسوع، منعلن إيماننا بإنّك الإله الوحيد المالك على حياتنا، وبإنّو الحياة بتنبع منك وبترجع لإلك.
جاورجيوس القدّيس، اللي شهد لقيامتك من بين الأموات، وعانى الألم حبٌّا فيك يا إله المحبّة، اليوم بيدعينا بنهار عيدو إننا نتمثّل بحياتو ونتخلى عن كل شي بيبعدنا عنّك.
ونحنا كمان بدنا نكون متل القدّيس جرجس والرسل، ونترك مجال لإلك تا تفوت عا قلوبنا، وتنقّيا وتقدّسا تا تعرف تشهدلك بأمانة ونستشهد عن أنانيتا تا نقوم معك بفرح حقيقي وثابت ما بيتزعزع.
ومتل مار جرجس والرسل وكل القدّيسين بدنا نسلّمك حياتنا يا ربّ تا تكون مراية عن حياتك اللي عشتا عالأرض ونحبّك متل ما حبّيتنا يا إلهنا الحبيب.
/الخوري يوسف بركات/
