مع إشراقة نورك بصباح هالنهار المجيد، منرفعلك يا ربّ التسبيح والمجد والشكر على حبّك اللي ما إلو حدود لألنا.
شو حلو يا ربّ، بهالصباح، نتأمّل بكلام يوحنا المعمدان اللي بيقول لتلاميذو إنّو هوي بيفرح لمّن رسالتك بيقبلوها الناس.
شو حلو يا ربّ، بهالصباح، إننا نسمع يوحنا المعمدان عم بيقول لتلاميذو إنو عليه هوي إنو ينقص تا إنت تزيد وتكون الأساس.
شو حلو يا ربّ، بهالصباح، إننا نشوف هالفرح الكامل اللي فرحو يوحنا المعمدان هوي وعم يحكي عنّك لتلاميذو ويبعتن لعندك.
وشو حلو كمان يا ربّ، بهالصباح، إننا ناخد مقصد من شخصية يوحنا المتواضعة ونحطك الأساس بكل أقوالنا وأعمالنا ونهج حياتنا.
وشو مهم يا ربّ، بهالصباح، إننا ناخد بكلام يوحنا المعمدان، ونفرح بإنّك تكون ملك حياتنا وندوب بحبّك.
/الخوري يوسف بركات/
