10 Jan
10Jan

ببداية هالأسبوع المبارك، وبصباح هالنهار المبارك، منرفعلك التسبيح والتمجيد يا إله السماوات.

يا يسوعنا الحبيب، حياتنا إختصرتلنا ياها بأبعاد تلاتة: الماضي والحاضر والمستقبل.

ما لازم ننغلق بالماضي، لا بل عم نحاول نملّي حاضرنا من الرجا، ونكون عم نتمّم مشيئتك بالمستقبل.

كلنا ثقة يا ربّ إنّك حاضر معنا دايماً وبكل لحظة من لحظات حياتنا، عم تعطينا القوة بكلامك اللي ما بيموت لا بالماضي ولا بالحاضر ولا بالمستقبل.

حضورك معنا يا ربّ بيدعينا تا نكون رسل ونكون على مثال يوحنا المعمدان، نبشّر ونشهد لإلك ونحضّر الطريق تا تجي وتسكن بالقلوب.

يا ربّ، بدنا نكون، كل واحد وواحدة منا، متل يوحنا المعمدان، صوت صارخ يصرخ بإيمان ويعلن بإيمان إسمك وين ما كنا، بدنا نضلّ على تواصل دايم معك، ومتل ما نادى يوحنا المعمدان بالتوبة لمغفرة الخطايا، نحنا بدنا ننادي بالمحبة اللي بدعينا تا نعيشا.


/الخوري يوسف بركات/

تعليقات
* لن يتم نشر هذا البريد الإلكتروني على الموقع.