صبحية مع الرب


06 Jun
06Jun
إعلان خاص

بصباح هالأحد المبارك منشبّحك ومنمجّدك يا اله السما والأرض.

صحيح كلامك يا ربّي يسوع لمن بتدعي اللي بيحبوك تا يحفظو وصاياك وكلمتك.

بس ايا كلمة بدنا نحفظ، نحنا تلاميذك بظل القوانين والدساتير اللي عم نشوفا بحياتنا؟المشكلة هيي فينا يا ربّ، نحنا اللي بعدنا مش مصدقين انّو كلامك منّو قانون بيلزمنا بالحياة، وانو كلمتك هيي وصية وزاد تا نشوف بطريقة افضل واوضحة الطريق اللي بدنا نمشي فيه صوبك.


بعدنا مش مصدقين انّو كلمتك هيي مجموعة من الاعمال الحياتية انتي جسّدتا يا ربّي يسوع بحياتك عالأرض لمّن عشت فعل الخدمة والحبّ اللامتناهي والمجبول بالتواضع معنا وبيناتنا وتجاهنا.


يا رب انت عم تدعينا لهالحبّ، لعطاء الذات بالكامل، ولتسخير مواهبنا لخدمة القريب والغريب.

فيا ربّ، بدنا كلمتك تكون مشروع حياتنا اليومية.



/الخوري يوسف بركات/

Social media khoddam El rab
تعليقات
* لن يتم نشر هذا البريد الإلكتروني على الموقع.