28 Dec
28Dec
إعلان خاص

بالتهليل والتسبيح والشكر منستقبل نور هالنهار اللي أشرقتو علينا يا إله السما والأرض.

بتأمّلنا للمجوس اللي إجو لعندك يا ربّ، بيسوقفنا فعل السجود اللي عملوه المجوس لمّن وصلو عا باب المغارة وقبل ما يفوتو سجدو لإلك يا طفل المذود، وهالسجود منّو إلاّ دلالة على ألوهيتك، وإعتراف بملوكيتك.

منتأمّل بهالمجوس التلاتة اللي جايين من بعيد حتى يسجدولك ويقدمولك البخور دلالة للعبادة والذهب رمز الملوكية والمرّ إستباق لآلامك يا إلهنا الحبيب.

مع المجوس الثلاثة منرفعلك قلوبنا يا ربّ ومنعترف فيك إلهنا الوحيد، وإلك منقدّم عائلاتنا تا تباركا وتقدّس كل فرد فيها.

مع المجوس التلاتة منرفعلك يا ربّ عقولنا ومنعترف فيك إنّك إنت ملكنا ووحدك المالك عا حياتنا، وفيك منقوى عا كل تجارب الشيطان الماكر.

ومع المجوس التلاتة بدنا نشكرك يا ربّ لأنّك إحتملت الآلام، ونحنا بدورنا رح نقدّملك آلامنا وصعوبات حياتنا.


/الخوري يوسف بركات/

تعليقات
* لن يتم نشر هذا البريد الإلكتروني على الموقع.