مع قرب العيد، عيد تجسّدك يا ربّي يسوع إنسان بيناتنا، منرفعلك كل التسبيح والمجد والإكرام ومنشكرك على تواضعك وإنمحاءك وحضورك معنا وبحياتنا.

يا ربّي يسوع، برسالتك العلنية عا هالأرض، ما حدا قدر يلومك عا ولا خطية لأنك إبن الله الآب وبتحكي كلام الله، وكل أعمالك هيي من الآب ولتمجيد الآب.

وهيدا هوي جوهر إيماننا المسيحي يا ربّ، إننا نعيش وكل هدفنا بالحياة إننا نمجّد الله الآب اللي خلقنا أحرار وعطانا الحياة بملآا.

نحنا المسيحيين، مدعوين تا نتشبّه فيك يا ربّي يسوع ونستحق إننا نكون تلاميذك ورسلك، لمّا كل هدفنا بيصبّ لخدمتك وخدمة إخوتنا البشر وكل إنسان بحاجة لإلنا.

ونحنا المسيحيين، ما ممكن يكون عنا غيرك مثال أعلى نتشبّه فيه بالقول وبالعمل، وحدك يا يسوع اللي بتعطينا القوّة تا نقدر نقول كل اللي منسمعو منك بكلامك الحي، ونترجمو أفعال بحياتنا.

/الخوري يوسف بركات/