19 Dec
19Dec
إعلان خاص

بصباح هالأحد الفارح منرفعلك يا ربّ أناشيد التسبيح والمجد والشكر على كل نعمك وعطاياك وعلى محبّتك اللامتناهية.

بهالأحد المبارك، اللي منذكر فيه السلالة الشهيرة اللي منها أخدت إنسانيّتنا وتخلّيت عن عرشك السماوي، منشكرك يا يسوع عا محبتك اللي تجلّت بتجسّدك كرمالنا وكرمال خلاصنا.

منشكرك يا يسوع لأنّك شلتنا من ضعفنا ومن خطيئتنا لمّن صرت إنسان بيناتنا، ورجّعتلنا كرامة ابناء وبنات الله لمّن أخدت عا عاتقك مصالحة ضعف البشريّة بالمحبّة الإلهيّة.

بهالأحد المبارك، منسألك يا ربّ انّك تعطينا، من خلال روحك القدوس، نعمة الوعي لهالبنوّة الالهية اللي بتدعينا لإلها، ونعيش بين الناس شهود لمحبتك ونفتخر بإننا أبناء وبنات الملكوت، وما يكون في شي بيبعدنا عن الإتحاد فيك لا جاه ولا مال ولا مركز ولا سلطة، ويكون المحتاج والفقير وجهتنا صوبك يا ربّ.


/الخوري يوسف بركات/

تعليقات
* لن يتم نشر هذا البريد الإلكتروني على الموقع.