27 Nov
27Nov
إعلان خاص

بصباح هالأحد المبارك اللي فيه عم نعيش زيارة العدرا مريم لنسيبتا أليصابات منرفعلك يا رب كل التسبيح والتمجيد يا ربّ السما والأرض.

فرحة كبيرة عاشتا الختيارة أليصابات، اللي رحمتا يا ربّ وخلّيتا تحبل بيوحنا بعد ما كانت عاقر وما بتجيب ولاد، فرحت لمّن شافت إمّك الحاملتك بأحشاءا جايي تا تزورا وتخدما بكل فرح.

فرحة كبيرة عاشتا مريم العدرا إمّك، اللي تركت كل شي قامت عالسريع بعد البشارة تا تحملك للآخرين يا ربّ، وتعطي فرحك وسلامك ليللي بحاجة للفرح.

فرحة كبيرة عاشا الجنين يوحنا اللي رقص ببطن إمّو لمّن إلتقى فيك بهالزيارة، يوحنا اللي مخصّصلو مشروع كبير بحياتو وهوي إنو يحضّر الناس لمجيئك يا ربّ ويدعيهن للتوبة.

وفرحة كبيرة عم نعيشا يا ربّ، نحنا ولادك اللي داعي كل واحد وواحدة منا تا نعلنك مسيحنا وملكنا وإلهنا وحبيبنا، وهالفرحة بتكتمل لمّن منترجم إيماننا بأعمالنا.


/الخوري يوسف بركات/

تعليقات
* لن يتم نشر هذا البريد الإلكتروني على الموقع.