21 Nov
21Nov
إعلان خاص

بصباح هالأحد المبارك اللي فيه عم نتأمل لقاء الملاك بالعدرا مريم، منرفعلك يا الهنا القدّوس كل المجد والاكرام ومنشكرك على حبّك اللامتناهي لإلنا.

عظيم انت يا الله الآب السماوي، بعتت الملاك جبرائيل لعند العدرا مريم، هالصبية اللي كرّستلك حياتا بفعل حبّ وإيمان، تا يعطيها سلامك ويبيّنلا قدّيش حبّك كبير لإلها وللبشريّة، بفعل البشارة بتجسّد الله الإبن يسوع بأحشاءا الطاهرة.

عظيم انت يا الله الابن الحبيب يسوع المسيح، الكلمة المتجسّدة بأرضنا وبقلوبنا، انت اللي جيت تا تعطينا الخلاص وتشيلنا من خطايانا.

منشكرك عا فيض حبّك إلنا اللي خلّاك تشابهنا بكل شي ما عدا الخطية.

عظيم انت يا الله الروح القدس المعزّي، مبدأ حياتنا الروحية.

انت اللي حللت عالعدرا مريم، وبقوتك حِملِت بأحشاءا الرب يسوع.

منشكرك لأنك عم تشرق بقلوبنا نور المسيح تا يشعّ، من خلالنا، عا كل انسان ناطر لمسة حبّ الله وحنانو ورحمتو بحياتو.


/الخوري يوسف بركات/

تعليقات
* لن يتم نشر هذا البريد الإلكتروني على الموقع.