13 Nov
13Nov
إعلان خاص

بنهاية هالأسبوع المبارك يا ربّ، منسبّحك بقلوب مليانة محبّة تجاهك وعم تسعى إنها تحبّ الآخرين يا إله المحبة اللامتناهية، ربّنا يسوع المسيح.

وين بيقدر الإنسان يلاقي حبّ متل اللي إنت حبّيتنا وبعدك عم بتحبّنا ياه يا ربّ؟ ما ممكن لا بل مستحيل يلاقي إلاّ عندك يا يسوع لأنّك إنت نبع المحبّة.

وين بيقدر الإنسان يلاقي إله غيرك يا ربّ، مليان حب ورحمة وغفران بعيد عنّك با ربّ؟ ما ممكن لا بل مستحيل يلاقي لأنّو ما في حدود لرحمتك ولا لغفرانك إنت اللي غفرت وبعدك عم تغفر لكل اللي عن يجرح قلبك الطاهر والقدّوس.

وين بيقدر الإنسان يلاقي ملك يحبّو ويدافع عنّو ويفتديه بدمّاتو غيرك يا ربّ؟ ما ممكن لا بل مستحيل يا يسوع لأنّك مش حيللا ملك، إنت ملك الملوك وربّ الأرباب وإله الآلهة اللي، عا قد ما بتحبّ ولادك وشعبك، تنازلت عن مملكتك تا تكون معنا وتقوينا بحضورك بيناتنا وتموت كرمالنا.

كيف ما بدنا نعلنك إلهنا ومخلّصنا والمالك الوحيد عا حياتنا يا ربّ؟


/الخوري يوسف بركات/

تعليقات
* لن يتم نشر هذا البريد الإلكتروني على الموقع.