12 Nov
12Nov
إعلان خاص

مع إطلالة هالصباح منرفعلك يا رب الحان التسابيح اللي بتليق فيك يا إله الكون.

كلامك يا يسوع فيه حياة لكل إنسان بيآمن فيك إيمان ثابت، وبيعطي قوّة رجا ما بتنوصف بأماكن وأزمنة إنفقد فيا الرجا.

يا يسوعنا الحبيب، ما فينا ما نلمس هالرجا بصلاتك اللي صليتا للآب السماوي كرمالنا ومش بس كرمال اللي كانو حويليك من إمّك العدرا والتلاميذ.

يا يسوعنا الغالي، ما فينا ما نلمس إيمانك فينا، حتى إنو رغم كل شي عم نعملو فيك، بتضلك بتوثق فينا وناطر إننا نرجع نشدّ عزيمتنا معك ونكمّل مشروع القداسة اللي دعيتنا إننا نمشيه.

يا يسوعنا الفادي، ما فينا ما نلمس حبّك لكل واحد وواحدة منّا، خاصة لمّن منسمعك عم تطلب من بيّك السماوي إنّو يخلينا معك بالمكان اللي إنت فيه، ونتنعّم بالمجد معك.

بس الدور علينا نحنا إذا منوافق إننا نكون معك أو لأ، ومنعرف إنّو الموافقة بدّا إرادة وتخلّي منّا عن أنانيّتنا.
ونحنا بدنا نكون معك يا ربّ.


/الخوري يوسف بركات/

تعليقات
* لن يتم نشر هذا البريد الإلكتروني على الموقع.