09 Nov
09Nov
إعلان خاص

بصباح هالنهار المبارك، منرفعلك يا ربّ كل التسبيح والتمجيد والشكر لأنّك دايماً حاضر معنا.

اللي بيدهشنا يا بسوعنا الحبيب، إنّك إنت الإله المنزّه عن الخطيّة، عم تطلب من الآب السماوي إنّو يحفظ كل واحد وواحدة منّا من الشرّير وقوّاتو.

واللي بيفرّحنا يا يسوعنا الحبيب لمّن منشوف قدّيش نحنا مهمّين بعيونك، وهيدا اللي بيدفعنا على إنّو تكون عنّا هالإرادة الصلبة تا تعمل، بكل نشاط، على إننا نحنا كمان نفرّح قلبك ونكون بالمستوى اللي بتريدو.

عجيب إنت يا ربنا يسوع المسيح، إبن الله الحي، كيف بتفتخر بكل واحد وواحدة منا قدام الله الآب، اللي من فرط حبّو لإلنا شخصياً، أرسلك تا تخلّصنا وتفدينا.

عظيم حبّك يا ربّ وما إلو حدود، حتى إنّك ضحّيت بذاتك تا تمحيلنا خطايانا وتعطينا الحياة الأبديّة معك.

ومتل ما إنت، الرب الإله ، صلّيت لبيّك تا يحفظنا ونكون أوفياء لإسمك، هيك نحنا بدنا نسعى تا نكون أمينين لرسالتنا وهيي إننا نعلن حبّك فينا ونترجمو بالعالم.


/الخوري يوسف بركات/

تعليقات
* لن يتم نشر هذا البريد الإلكتروني على الموقع.