ببداية هالأسبوع المبارك، ومع إشراقة هالصباح المجيد، وبهالنهار اللي فيه عم نذكر جميع القدّيسين، منرفعلك يا ربّ كل التسبيح والتمجيد.

متل كل هالقدّيسين اللي سبقونا لعندك يا ربّ، منتمنى نكون.

بس تا نكون متلن بدنا نسعى تا نعيش الحياة اللي عاشوها عا هالأرض، حبّ لإلك ولكلّ الناس.

متل كل هالقدّيسين اللي سبقونا لعندك يا رب، بدنا نعيش التسليم الكلّي لإلك، تا نقدر نستحق منّك الطوبى اللي طوبتن ياها.

متل كل هالقدّيسين اللي سبقونا لعندك يا ربّ وعاشو مساكين ومهمّشين بنظر الناس، بس كنت انت هدفن، بدنا نعيش وعيوننا وقلوبنا كلها صوبك.

متل كل هالقديسين، اللي سبقونا لعندك يا ربّ وهاشو الوداعة والتواضع ونقاوة القلب، هيك بدنا يكون نمط حياتنا عالأرض يا ربّ.

وما في أجمل من إننا نكون عم نزرع سلامك بالمحيط اللي عايشين فيه وكلّ هدفنا منو إننا نكون قديسين يا ربّ.

/الخوري يوسف بركات/