صبحية مع الرب

بصباح هالأحد المبارك اللي فيه منعيّدلك يا الله الثالوث، الآب والابن والروح القدس، بدنا نشكرك.

بدنا نشكرك يا الله الآب لأنّك خلقتنا بهالحياة ودعيتنا اننا نكون صورتك ومثالك من خلال اعمالنا واقوالنا وطريقة عيشنا.

بدنا نشكرك يا الله الإبن لأنّك عطيتنا كلّ سلطان بالسما وعالأرض ولأنّك افتديتنا متت عن خطايانا وقمت كرمال تعطينا الحياة الأبدية.

بدنا نشكرك يا الله الروح القدس لأنّك عم بتكون حاضر دايماً بحياتنا ولأنّك عم بتوجّهنا، كل ما منطلبك، صوب الطريق الصحيح، طريق الملكوت.

يا الله الثالوث الأقدس، عطينا القوّة والحكمة والنعمة بجهادنا بهالحياة تا نقدر نحقّق رسالتنا اللي دعيتنا اننا نعيشا بهالعالم بصبر وطول الاناة.

يا الله الثالوث الأقدس نحنا مندعيك، بقلب تايب، انّك تغفرلنا خطايانا وتنوّرلنا عقولنا تا نعرفك اكتر ونعمل بمشيئتك وتكون حياتنا كلّا تحضير للقاءك.

/الخوري يوسف بركات/