شو حلو الصباح بنص الجمعة لمن بيبلش بنورك يا ربّي يسوع المسيح.

دايماً بتزرع كلامك بقلوبنا يا ربّ متل ما بينزرع الزرع بالأرض.

ما بتستثني حدا ولا بتهمل حدا، لا بل بتضلّك عم تزرع المحبّة بكل واحد وواحدة منا بالوقت المناسب وبالمكان المناسب، ونحنا اللي منقرر النتيجة.

فإذا تفاعلنا معك يا ربّ وكنّا أرض طيبة، رح بتفيض ثمار الأعمال الصالحة فينا وبمحيطنا، من خلال طريقة عيشنا معك.

إذا تفاعلنا معك يا ربّ وكنّا أرض جيدة، رح بتردّ فينا الحياة، اللي خسرناها بسبب جهلنا وخطيتنا، وبيتحقق ملكوتك بداخل كل واحد وواحدة فينا.

إذا تفاعلنا معك يا ربّ وما خلينا هموم الحياة ومشاكلا تاخدنا لمحل ما بدنا ياه، أكيد رح نستاهل الطوبى لأننا عم نحمل معك الصليب بفرح.

عطينا يا رب سلامك، وأمانك، وفرحك تا نقدر نسلمّك ذاتنا كل يوم وكل لحظة، بالصوم والتأمل والصلاة والخدمة بمحبة، ونثبت ونستقر فيك للأبد.

/الخوري يوسف بركات/