منسبّحك ومنمجّدك يا ربّ بهالصباح المبارك عا كل نعمك وعطاياك اللي بتفيضا علينا.

يا ربّي يسوع، عملك الدايم هوي خلاص كل إنسان ، وعم توعّيه، متل ما وعّيت اليهود، إنّو الإيمان فيك الله الحاضر بين شعبو هوي باب للملكوت والطريق هني الأعمال بحسب وصاياك.

يا ربّي يسوع، إنتَ اللي دعيت اليهود وبتدعينا تا نآمن فيك ونكون رسلك نحمل رسالة المحبة للعالم، بس نحنا، وبكتير من الأوقات ، عم نكون متل هاليهود اللي رفضوك، عم نشوّه هالرسالة وما عم نكون أمينين لإلك وعم نستغل الحرّية اللي عطيتنا ياها لتحقيق رغباتنا.

يا ربّي يسوع، إنت اللي عم تدعينا تا ناخد الله الآب مرجعيتنا وما نتصرف من ذاتنا، عم بتشدّدنا على إننا نعيش المحبة لإلك ولإخوتنا تا يتحقق مشروعك الخلاصي فينا وبحياتنا.

يا ربّي يسوع، شو حلو هالإنسجام بينك وبين الآب، وشو مهم إنو يكون عنا نحنا الإنسجام بيننا وبينك من خلال العمل لتحقيق السلام بقلوب كل اللي منلتقي فيون.

/الخوري يوسف بركات/