منرفعلك كل التسبيح والمجد والاكرام والشكر يا ربّ عا كل نعمك وعطاياك اللي بتفيضا علينا.

عظيم انت يا الله الروح القدس، وشو منهملك بحياتنا، مع انّو كل الشغل بحياتنا الروحية عليك: انت اللي بتدفعنا تا نقول الحقيقة بكل المواقف اللي منواجها، انتي اللي بتمشينا عا درب القداسة، انتي اللي بتعزّينا بالوقت اللي منكون فيه بحاجة للمسة رجاء، انت اللي بتقوّينا روحيا وبتشدّدنا بالوقت اللي منكون فيه بحالة احباط، وانت اللي بتساعدنا على اننا نتخطى الصعوبات اللي بتعترضنا بحياتنا معك.

فيك يا روح الله نحنا منقوى عا سلطان الشرير اللي بيحاول يقيّدنا، وفيك يا روح الله منلاقي السلام الداخلي اللي ما ممكن حدا ينزعو منّا اذا حطيناك القائد والربّان لسفينة حياتنا.

لهيك لمّن منرفض حضورك بحياتنا، ومنرفض انّك تفوت عليها وتطرد كل قوى الشرّير اللي عم بتجذّر الخطية فينا، هيدا هوي التجديف عليك، وهوي الموت الابدي.

لهيك نحنا منسلمك دفّة حياتنا تا انت تقودنا للملكوت.

/الخوري يوسف بركات/