صبحية مع الرب


20 Sep
20Sep
إعلان خاص

منسبّحك ومنمجّدك ومنباركك يا ربّ بهالصباح المبارك وكلنا رجا بأسبوع مليان من فرحك وسلامك.

يا ربّي يسوع، الحياة معك هيي اهم شي بالوجود، وبتستحق كل ثمن منقدّمو حتى لو كان الاستشهاد.

ولمن منقدّملك حياتنا يا ربّ منكون عم نحقق ذاتنا فيك.

ونحنا اللي منآمن فيك يا ربّ، هدفنا نتبعك ونكون تلاميذك ورسلك بالعالم، بس المشكلة لمن بتوصل القصّة للخيار بين ذاتنا وبينك، عم نختار ذاتنا وملذاتنا.

صعبة الخيار يا ربّ قدام مغريات هالعالم الزايل، لهيك دعيتنا تا نتخلى عن ذاتنا ونتبعك.

والتخلي عن الذات هوي بذاتو صليب، وهالصليب هوي اللي بدو يوصلنا للملكوت، شرط اننا نحملو بفرح، مهما كان كبير وبيوجّع.

وهيدي هيي رسالتنا، نحنا اللي مآمنين فيك انّك الهنا ومخلّصنا، اننا نكون سمعان القيرواني نتقرّب منّك اكتر وأكتر تا نحمل معك الصليب ونتبعك وتكون انت هدف وغاية حياتنا يا ربّ.

بدنا نتبعك يا ربّ ولو بأصعب الظروف، لأننا كلنا ثقة من انّو بالنهاية رح تنتصر الحياة معك على الموت بالخطية.


/الخوري يوسف بركات/

تعليقات
* لن يتم نشر هذا البريد الإلكتروني على الموقع.