صبحية مع الرب


14 Sep
14Sep
إعلان خاص

بهالعيد المجيد، اللي فيه عم نعيّد عيد إرتفاع الصليب المقدّس، منرفعلك قلوبنا فعل حب وشكر لألك يا ربّ لأنّك كل يوم، ومع كل إطلالة صباح، منلاقيك حدنا وناطر تا تحمينا من كل التجارب والصعاب.

بكتير من الأوقات بحياتنا، وخصوصي بهالأزمة اللي عم نمرق فيا، منواجه كتير من المصاعب والشدايد بحياتنا يا ربّ، بس بالإيمان منحطّن كلّن قدام صليبك المقدّس تا تملّينا قوة نقدر نواجه، بقوّة الروح القدس، كلّ شي بيبعّدنا عنّك، ونتغلّب عليه.

منتأمل بخشبة الصليب كيف كانت رمز للهلاك، وصارت معك رمز للخلاص، وبإشارة الصليب منستمدّ قوّّة وقدرة نتغلّب فيون عا كل تجارب الشرّير اللي بيحاول يستعبدنا بشهواتنا وأنانيّاتنا.

ومن صليبك اللي صار جسر نعبر منّ خلالو لسرّ حبّك العظيم، منتعلّم انّو معك ما في شي مستحيل لأنّو معك، ومن خلالك، منقدر نصنع العجايب.

صليبك هوي مصدر تعزيتنا وسلامنا وفرحنا وقوّتنا، وفيه منزداد ايمان وثبات فيك يا يسوعنا الحبيب.


/الخوري يوسف بركات/

تعليقات
* لن يتم نشر هذا البريد الإلكتروني على الموقع.