صبحية مع الرب


07 Sep
07Sep
إعلان خاص

بكل يوم وبكل لحظة منرفعلك كل التسبيح والتمجيد يا ربّنا والهنا ومنشكرك عا كل نعمك وعطاياك اللي بتفيضا علينا من نبع حبّك.

كتير من الاوقات ومن المواقف بحياتنا منكون فيها متل هالشبّ الغني اللي عم يسألك عن الحياة الأبدية، منفتّش عن مبرّرات تا نحتفظ بأموالنا وبدنيوياتنا وبالمقابل كمان نربح الملكوت.والمشكلة عند هالشبّ الغني هيي بجيبتو، وعنّا نحنا هيي بأنانيّتنا اللي عم تمنعنا من اننا نكون ذاتنا واللي ما بتتحقّق فعليّا الا بألله.

هالشبّ الغني اعترف فيك انّك صالح، وكان ناطر منّك تبادلو بذات الاعتراف تا يكون مرتاح، لكنّك حطّيت اصبعك عالجرح، أموالو. مع انّك اخترتو تا يتبعك بس فضّل انو يختار المال إله عليك.

ونحنا كمان، اخترتنا تا نكون تلاميذك ورسلك، نعلنك اله عا حياتنا رغم كل صعوباتا، ولكن عنّا آلهة كتير عم تمنعنا من اننا نتبعك.
بدنا نتخلى عنها كلها تا نختارك الهنا ونتبعك لأنّك وحدك الحقّ والحقيقة.


/الخوري يوسف بركات/

تعليقات
* لن يتم نشر هذا البريد الإلكتروني على الموقع.