صبحية مع الرب


05 Sep
05Sep
إعلان خاص

منرفعلك كل التسبيح والمجد والإكرام يا اله السما والأرض، ومنشكرك عا نعمة الحياة اللي عاطينا ياها.

أصعب شي عالإنسان يا ربّ انّو يفحص ضميرو وخصوصي بعد هالمثل اللي بتحكيلنا فيه عن طريقة الصلاة بين الفريسي والعشار.

شو صعب علينا يا ربّ اننا نعترف بخطايانا، وخصوصي بخطيّة النظرة الفوقيّة تجاه الآخرين، وبخطيّة الكلمات والاتهامات الجارحة بحقّن بغضّ النظر اذا صحّ أو غلط.

والأصعب هوي إننا منعتبر حالنا متل هالفريسي "قديسين" لأننا عم نجي عالكنيسة نصلّي، أو عم نعمل "أعمال خيرية" تا يشوفونا الناس ويعظّمونا.

ومن ميلة تانية، منشوفك دايما حاضر يا ربّ تا تستقبلنا كيف ما كنّا. بيتك وقلبك مفتوح لكل إنسان بيلتجي لإلك بكل حالاتو، وما بتملّ من دعوتك لإلنا تا نرجع عن خطايانا اللي عم تحط حواجز بيننا وبينك وعم تمنعنا من اننا نلتقي فيك.

همّنا الوحيد اليوم انّنا نرجع نقوّي هالعلاقة فيك بمحبّتنا لإخوتنا وأخواتنا، وبالكلمة اللي بتبني وما بتهدّم.


/الخوري يوسف بركات/

تعليقات
* لن يتم نشر هذا البريد الإلكتروني على الموقع.