صبحية مع الرب


30 Aug
30Aug
إعلان خاص

مع انطلاقة هالاسبوع المبارك منبتدي صباحنا بتمجيدك وشكرك يا ربّ الأرباب.

عم نسبّحك يا ربّ متل ما سبّحك الطوباوي الأخ إسطفان نعمه وكل قدّيسي لبنان اللي سبقونا، وكانت حياتن تحقيق لمشيئتك عالأرض.

عم نرفعلك الإكرام يا ربّ، مع قدّيس المستقبل اسطفان نعمه اللي ترك كل شي، الأرض والأهل وكل مغريات العالم، تا يكون معك وتكون وحدك مصدر سعادتو.

عم نمجّدك يا ربّ، مع الأخ اسطفان نعمه اللي كانت كل أعمالو وأقوالو مراية تعكس نورك للعالم، واللي كان هدفو الأوحد والدايم انّو يخلّص حالو ويحصل عالحياة الأبدية معك.

ومع هالقدّيس المتواضع، اسطفان نعمه، بدنا نشكرك هلق وبكرا ودايما لأنّك عم بتكون حاضر بكل لحظة من لحظات حياتنا، وبدنا نعترف فيك ألهنا ومخلّصنا الوحيد، وتكون انت اساس حياتنا يا ربّي يسوع.


/الخوري يوسف بركات/

تعليقات
* لن يتم نشر هذا البريد الإلكتروني على الموقع.