صبحية مع الرب


22 Nov
22Nov


صباح التلمذة الحقيقية هوي صباحك يا ربّي يسوع.

قديش في ناس يا ربّ همّن الوحيد طلب الآيات والمعجزات، بينما اللي بدّك ياه انت هوّي التوبة.

الآية بتسحرنا ومنعيش الفرحة موقّتا وبتقطع لأننا ما منكون عايشين الايمان الحقيقي، بينما التوبة هيي الأهم وهيي الآية الأساسيّة اللي بتخطفلنا قلوبنا وبتدفعنا اننا نرجع نتعلّم التلمذة لإلك.

التوبة بتعلمنا، من خلالك عالصليب، شو معنى الحب الحقيقي وكيف هالحب بيودّينا لخلاصنا وبيخلّينا شهود حقيقيين لالك بالعالم.

بالتوبة الحقيقية والارادة الصادقة منطلع من انانيتنا وساعتا منستحق الطوبى اللي قلتلنا ياها، وهيك منكون عم نحفظ كلمتك ونعمل فيها.

بدنا نحبّك يا ربّ، ونرجع لإلك بقلب تايب تا نصير آية وشهود لإلك قدام عيلنا ومعارفنا، ونعبّرلك بمسلك حياتنا عن صدق حبّنا لإلك.


/الخوري يوسف بركات/

تعليقات
* لن يتم نشر هذا البريد الإلكتروني على الموقع.