صبحية مع الرب


13 Nov
13Nov



اليوم، بهالصباح المبارك، بدّي سبّحك يا ربّ السما والأرض مع شفيع الواعظين، القدّيس يوحنا فم الذهب.

من هالقدّيس العظيم، منتعلّم كيف نسلّم ذاتنا لالك ونمشي دربك درب القداسة متل ما مشيها هوي رغم كل الاضطهادات اللي تعرّضلا.

من هالقديس الخطّيب القدير، منتعلّم كيف نحكي كلمة الله بثقة، متل ما هوي كان يوعظ وينشر كلمتك، كلمة الحق، وين ما انوجد.

من هالبطريرك القدّيس منتعلّم كيف ندير حياتنا عا ضوء تعاليمك، متل ما هوي عرف استعمل مركزو تا يدير شؤون الكنيسة بأمانة.

من هالرجل المصلّي، منتعلّم كيف نبني علاقة الحبّ معك، متل ما عاشا هوّي بالزهد عن كل شي بيعلّق الانسان بهالدني.

مع يوحنا فم الذهب، بدنا نرفعلك كل المجد يا الهنا الحبيب يسوع لأنّك حطيتو قدّامنا مَثَل لكلّ انسان اختارك إله حياتو وقرّر يمشي معك درب القداسة لو مهما صار.

/الخوري يوسف بركات/

تعليقات
* لن يتم نشر هذا البريد الإلكتروني على الموقع.