صبحية مع الرب


07 Nov
07Nov


صباحي معك يا رب هوي الاخوّة الصالحة والتلمذة الحقيقية.

شو بدنا أجمل من هيك كلام بتحكينا ياه لمن بتشيل عنّا صفة العبيد وبتلبّسنا صفة التلاميذ؟

شو بدنا أجمل من كلمة احباء قلتلنا ياها تا تعبّرلنا عن مدى حبّك لكل واحد وواحدة منّا؟

شو بدنا أجمل من دعوتك لالنا تا نكون بين العالم ونعكس كلامك وحبّك لكلّ العالم؟

قديش عندك ثقة بكل حدا منا، نحنا اللي عم نحاول نعيش معك، انو منقدر نتبادل المحبة والاحترام بين بعضنا لبعض ونثبت بالروح القدس.

وشو حلو يا رب نبادلك هالمحبّة من خلال محبّتتا لبعضنا البعض، ونكون عم نعكس صورتك وين ما منكون رغم كلّ التحدّيات. تا حتى كل اللي بيشوفونا، بيمجّدوك وبيعرفو انّك اله المحبّة واله السلام واله الفرح العاكس عا قلوبنا ووجوهنا.


/الخوري يوسف بركات/

تعليقات
* لن يتم نشر هذا البريد الإلكتروني على الموقع.