صبحية مع الرب


18 Oct
18Oct


صباح النور اللي ملألأ من القناديل المعبّاية من زيت المحبّة هوي صباحك يا ربّ.

شو حلو نكون متأهّبين لعرس لقاءك يا عريسنا الحبيب، تا نعبر معك من هالحياة الفانية للحياة الأبديّة.

شو حلو نكون مستعدّين لهاللقاء، لقاء عهد الحب بينك وبين كنيستك، شعبك السهران وقناديلو مشتعلة بزيت الاعمال الصالحة.

شو حلوة لحظة الانتظار بلهفة المشتاق تا نتحد فيك يا الهنا الحبيب، انت اللي حبّيتنا حبّ تخطّى حدود قدرتنا البشرية على انّا نفهمو ونستوعبو، حب عظيم ودّاك للموت فالقيامة تا ترفعنا معك للمجد السماوي.

يا ربّي يسوع، الباب مفتوح والدعوة لالنا انّو نفوت، والقرار عنّا. ونحنا، بقوّة روحك القدّوس رح نسعى انو نكون مستحقّين، من خلال اتّحادنا فيك ومحبّتنا وخدمة بعضا البعض، انّو نتنعّم معك بملكوتك.


/الخوري يوسف بركات/

تعليقات
* لن يتم نشر هذا البريد الإلكتروني على الموقع.