صبحية مع الرب


20 Sep
20Sep


صباح المحبة والتواضع والخدمة هوي صباحك يا رب.

كتار اللي بيبرّمو عالمراكز بهالدني، يا ربّ. وكتار اللي بيطمحو انن يوصلو للقمّة. بس المشكلة عم بتصير انّو عم يتحول طموحن لطمع وجشع بيتحقق عا حساب الناس والقيم الاخلاقية.

وكتار اللي بيطمحو لعيش حياة هادية وحلوة وسعيدة. بس المشكلة انّو يصير هالطموح عم بيشكل خطر عا صاحبو لأنو بيتحول لاحلام بدنيا افلاطونية خيالية.

اليوم بشوفك عم تدعيني يا رب من خلال يعقوب ويوحنا، والرسل العشرة الباقيين، تا اعرف عيش حضورك بحياتي، واعرف انو الوصول لعندك لازم يمرق بالصليب، بشرب كاس الآلام معك، وما افزع، لأنك معي.

بشوفك يا رب عم تدعيني تا عيش الخدمة متل ما عشتا انت، ملياني بالتضحية وبذل الذات، وأعرف انو تا اوصل لعندك لازم كون متخلى عن انانيتي وعن كل شي بيتعلق بهالأرض، مهما كان هالشي صعب.


/الخوري يوسف بركات/

تعليقات
* لن يتم نشر هذا البريد الإلكتروني على الموقع.