صبحية مع الرب
طلّ شهر ايار مع إشراقة هالصباح وحامل معو عطر العدرا مريم اللي بيفوح تسبيح وتمجيد الك يا ربّ.
طلّ شهر أيار وحامل معو الخير والبركة.
طلّ شهر أيار وفاحت معو نسمة الفرح والتعزية وين ما كان ولكل انسان.
طلّ شهر أيار وإمّك العدرا مريم مزيّنتو يا ربّ بصفاءا وبجمالا وبتواضعا وبحنانا وبحبّا لالنا نحنا ولادا اللي طلبت منها انها تكون امنا.
طلّ شهر ايار والعدرا مريم عم بتزيّن صباحو بحُبّا، ومساءو بنورك اللي ظاهر عا وجها.
وانت يا ربّ اللي نقّيتا تا تعظّمك بحياتا وتسلّمك ذاتا بكلّيتا، مريم حاضرة معنا تا تشجّعنا اننا ناخدا مثال وشفيعة لالنا بكل لحظات حياتنا حتى مماتنا.
مع مريم، ام البشرية المآمنة فيك اله ومخلّص وربّ، منرفعلك كلّ التسبيح والتعظيم والتمجيد يا الهنا الحبيب يسوع المسيح.
ومنها بدنا نتعلّم الصبر وعيش المحبّة وعمل الخير والتسليم لمشيئتك.
/الخوري يوسف بركات/
